Makaron pa eamang hay ginapapahaum eon it senado ro gobyerno sa posibleng pagtaas it presyo it langis sa world market tuga it desisyon it Saudi Arabia ag iba pang OPEC+ oil producers nga bawasan ro produksyon it 1.16 million barrels kada adlaw.
Suno kay Senate Committee on Energy Vice Chairperson Senator Sherwin Gatchalian nga dapat eon nga maghueag ro Department of Energy (DOE) nga insigidang makipag angot sa tanan nga mga industry players agud nga masiguro nga bastante ro suplay it enerhiya sa nasyon.
Dapat man sigon nga umpisahan it Land Transportation Regulatory and Franchising Board (LTFRB) ro pagpahaum sa uman nga pagpatuman it Pantawid Pasada Program.
Dugang pa ni Gatchalian nga dapat padasigan man it DOE ro pagpatuman it Electric Vehicle Industry Development Act agud nga mataw-an it katumanan ro maeapnagon nga paggamit it mga electric vehicles agud nga malikawan eon ro pagiging dependent it nasyon sa imported nga langis.
Sa tunga man it pabag-o bag-o nga presyo it langis, nauna eon nga gindihon ni Gatchalian ro Senate Bill No. 384, nga nagatuyo nga obrahon nga laye ro programang Pantawid Pasada agud nga makatukod it energy subsidy program para protektahan ro sektor it pampublikong transportasyon kontra sa mataas nga presyo it langis.
