KALIBO, Aklan—Nagapabilin nga nakaalerto ro gobyerno it Israel kasunod sa pag-atake it Iran.
Apang, suno kay Bombo International Correspondent Geng Sanchez, balik eon sa normal ro sitwasyon sa nasambit nga nasyon matapos nga naharang ro masobra sa 300 nga drone missiles nga ginbuhian it Iran.
Mabuhay eon suno kana nga hana nga umatake ro Iran apang bangud sa nag-agi ro Ramadan hay makaron pa eamang nanda raya gintuman.
Ginpahayag dugang ni Sanchez nga sa sueod it 15-anyos nga pagtrabaho sa lugar hay sanay eon sanda gyera apang raya ro unang kahigayunan nga umatake ro Iran.
Ro masaming nagasalakay sa lugar hay ro Hamas, Hezbollah ag ro Yemen.
Maskin nga sanay eon sa gyera hay nakakabatyag gihapon sanda it koeba ag kahadlok rason nga insigidang nagabakwit sa andang shelter ukon ginatawag nga kwartong bakal agud nga maeowas ro andang kaugalingon.
Angot kara, hugot nga ginkondena ni US President Joe Biden ro insidente.
Suno kay Biden, nakataeanang makipag pueong imaw sa G7 countries agud istoryahan ro ginhimo nga pagsalakay it Iran sa Israel.
Ginpabugae man ni Biden nga haeos tanan nga drones ag missiles nga ginbuhian it Iran hay na shot down it US forces.
Ginpahayag ni Biden nga makadaeayaw ro kapasidad it Israel nga depensahan ro mga pag-atake kontra sa andang nasyon ag nagapakita raya nga inde basta basta matinag ro seguridad it Israel.
