Uwa it kapasidad ro gobyerno it Pilipinas nga harangon ro hinyo nga asylum ni dating presidential spokesman Atty. Harry Roque sa The Netherlands, suno sa Department of Foreign Affairs (DFA).
Apang ginpaathag ni DFA Migrant Workers Affairs USec. Eduardo de Vega nga kun pangayuon it Dutch government sa gobyerno it Pilipinas nga magpaliwanag sa mga ginhathat nga rason ni Atty. Roque sa anang asylum bid, iga-pamilit sigon nga naga-gana ro demokrasiya sa Pilipinas ag bukon it minatuod nga may political prisoner ukon uwa raya nga-atubang sa political persecution sa nasyon.
Madumduman nga biglang nagbutwa sa publiko si Atty. Roque sa The Hague, Netherlands kasunod it pag-aresto kay dating Pangueong Rodrigo Duterte. Raya ro unang kahigayunan nga nagpakita imaw sa publiko matapos imaw nga isyuhan it arrest order it House Quad Committee angot sa anang pagkaimbolbar sigon sa iligal nga operasyon it Philippine Offshore Gaming operators (POGOs).
Nagsumite man it aplikasyon si Atty. Roque para sa asylum sa The Netherlands para sugtan imaw nga ma-representa ro dating Pangueo sa ICC apang nauna eon nga ginklaro ni VP Sara Duterte nga bukon kaibahan si Atty. Roque sa legal team it dating Pangueo.
Sa makaron, uwa pa it ginapaguwa nga detalye angot sa status it asylum application ni Atty. Roque.
