Kamlibo Aklan———–Obligado ro gobyerno nga iturn-over sa US Federal Bureau of Investigation (FBI) si Pastor Apollo Quiboloy it Kingdom of Jesus Christ church bangud sa pagkaeakot kara sa labor trafficking, sex trafficking, cash smuggling ag iba pang krimen.
Suno sa sangka batikan nga abugado nga si Atty. Plaridel Morania nga sandig sa extradition treaty it Pilipinas ag Amerika hay kinahangean ro kooperasyon it gobyerno para maresolba ro ginapangatubang nga kaso it nasambitan nga akusado.
Engkasong maihatod eun si Quiboloy sa Amerika hay idto nana paga-atubadngon ro anang mga kaso ag ro US court eun ro may gahom sa pagdesisyon.
Sa pihak nga parte, naalarma man makarun ro nag-akusa kay Quiboloy.
Sa sangka Facebook post, ginpahayag ni Arlene Caminong Stone nga owa ginsabat it mga abogado ni Quiboloy ro mga pinaka importanteng pangutana – kung owa baea raya it may nabiktimang mga menor de edad ag kung owa baea raya naeakot sa mga pagpangloko?.
Nasayuran nga mag-euwas sa ginapangatubang nga kaso ni Quiboloy sa Amerika, dati eun man imaw nga ginreklamo sa kaso nga rape, child abuse ag human trafficking it sangka babaye sa Davao.
Apang ro kaso hay ginbasura it Davao City prosecutor ko 2020 ag nakaapela makarun sa Department of Justice.
