Sigidas ro preparasyon it gobyerno probinsyal sa temporaryong billeting areas it mga estudyante ag iba pang delegado nga magapasakop sa Western Visayas Regional Athletic Association (WVRAA) Meet 2023 nga pagahiwaton umpisa Abril 26 hasta 30.
Suno kay Bobby Dela Cruz, chief construction section it Provincial Engineering Office ukon PEO Aklan nga puspusan ro andang trabaho agud nga maitao sa mga raya ro komportableng pagtinir nanda sa Aklan maging sa mga playing venues agud nga masigurado ro seguridad ag kaeuwasan it mga bisita.
Nauna eon nga ginpahayag it Deparment of Education ukon DepEd Aklan nga ro delegasyon it Iloilo hay magatinir sa Kalibo Elementary School ag Kalibo Pilot Elementary School samtang sa Aklan National High School for Arts and Trades (ANHSAT) hay ro Antique delegation; ro mga maghalin mat-a sa Guimaras hay gintaeana sa Makato, Negros Occidental sa Banga ag ro taga-Capiz hay sa Malinao.
Ginpasiguro pa ni Engr. Dela Cruz nga tinguhaon nanda nga matapos ro mga posible pang pagaayuson antes nga mag-umpisa ro sporting events.
