Uwa it specific nga plano ro gobyerno para masuportahan ro mga mangunguma sa nasyon.
Raya ro naging komento ni Mr. Kim Sin Tugna, provincial coordinator it Bagong Alyansang Makabayan ukon Bayan Aklan kasunod it waea-tuo nga problema sa agricultural products.
Suno kana, imbes nga suportahan ro mga mangunguma it paeay, sibuyas, bawang ag iba pa hay ro naging sabat it gobyerno hay ro importasyon.
Ginakabig nga agricultural country ro nasyon apang mismong ro Department of Agriculture ukon DA hay uwa it specific nga plano kon paano mapaumwad ag mapabaskog ro agriculture sector sa nasyon agud nga magabaha man ro supply it produktong agrikultura sa Pilipinas nga inde eon kinahang-ean nga mag-import sa ibang nasyon.
Mag-eowas kara, maging sa isda hay naga-import ro nasyon maskin nga napalibutan ro Pilipinas it kaeawran.
Raya hay matapos nga nag-abot eon ro gin-import it Pilipinas nga galunggong bangud sa kakueangan sigon kara it supply sa mga merkado
