Para sa sangka ginikanan makabig nga “God is good” matapos nga naghueat it masobra sa sang dominggo matapos nga maka register online sa DSWD portal.
Alas-4 paeang it agahon hay haom eon ro sangka manugbote nga ginikanan nga si Myline Zacarias residente it barangay Tugbungan, Pook sa banwa it Kalibo ag ro daywa karang onga para magapila sa ABL Sports Complex para sa educational assisatance nga igapanupod it DSWD.
Suno kay Myline nga sa tatlo nanang estudyante hay daywa eamang kara ro kwalipikado.
Owa sigon nana natapos nga macomply ro mga requirements para sa anang onga nga sa elementarya bangud sa maabo man ro nagaboue it mga kinahangaean nga papeles sa eskwelahan.
Suno pa kay Myline nga nadueaan eon sanda it pag-eaum nga makabaton pa it nasambit nga ayuda bangud Agosto 20 pa sanda nagparegister apang owa sa gihapon nakabaton it text confirmation maghalin sa taeatapan it DSWD.
Ko nagtaliwan nga Sabado nagwalk-in sigon sanda apang napas-eawan man bangud sa hugot nga pagpatuman it “No walk in” nga mga aplikante.
Grabeng kalipay sigon ro nabatyagan nanda matapos makabaton it text confirmation daywang adlaw antes ro misong adlaw it pagpanupod it taetapan.
Samtang, padayon nga padumdum it mga natungdan it ahensya nga owa sa gihapon sanda ga baton it walk in applicants ag indi man sa gihapon pagtrataron bangud prayoridad ro mga nakaregister nga nakabaton it text confirmation maghalin sa DSWD.
