Masadyang ginpakigbahin it sangka Aklanon nga atleta it kickboxing ro anang kadaeag-an sa Palarong Pambansa 2026.
Suno kay Jonabe Nicolas, gold medalist, bilang first timer sa nasambitan nga pahampang, mabahoe nga dungog ro makakuhit bueawan nga medalya sa anang kauna-unahang hampang.
Mabahoe man sigon nga oportunidad para kana nga mapaeakip sa kickboxing kun sa siin raya man kauna-unahang kahigayunan nga mapa-iba ro nasambit nga hampang sa mga kompetisyon.
Paathag pa nana, magkahalong kueba ag excitement ro anang nabatyagan bangud nga ray aro anang pinaka-unang kompetisyon sa national level, apang sa bulig it andang coaching staff sa andang gina-tao nga motibasyon ag laygay hay nagtinguha imaw para nga makuhit ro nasambit nga kadungganan.
Naging estratihiya sigon nana sa pagkuhit it bueawang medalya ro pag-tuon sa hueag it anang mga kontra para nga maka-isip imaw it pwede nana nga maipang-sukoe kara.
Sa makaron, sa pihak nga raya to unang kahigayunan nana sa nasambit nga kompetisyon, raya eon man ro anang ulihing dag-on nga makahampang kara bangud nga graduate eon imaw. Apang, una sa gihapon ro anang kagustuhan nga makapartisipar sa parehong sports pag-abot sa college level.
