Sakit sa ueo gihapon ro mga pasaway nga nakamotorsiklo ukon sanda nga mga ginbansagan nga ‘kamote’ riders.
Makangawa-ngawa nga nagkalhit ro mga nakamotor nga owa it nasayuran sa batas-trapiko ukon owa eang naila nga magsunod.
Maskin ro simpleng pagsuksok it helmet, pagsunod sa traffic light hay ginabalewala.
Kabay nga maintindihan naton nga maeayo man ukon maeapit ro gina-agtunan it nakamotor, dapat nga mag-helmet bangud nga owa it ginapili nga distansiya ro aksidente.
Mas mayad ro may pangsukoe sa pagkatumba ukon pagkabunggo kaysa nga owa.
Ag sa plano it Metropolitan Manila Development Authority (MMDA) nga magtukod it Motorcycle Riding Academy, pabor kita kara.
Pinaagi kara hay mabawasan ro mga nailistang aksidente sa karsada nga ginaeakutan it mga motorsiklo.
Base sa datos nga nailista it andang ahensya, naga abot sa 24,000 ro aksidente ko nagtaliwan nga dag-on nga puro naka-motor ro eakot.
kun pagasumahon sigon , ginatantiya nga 2,000 ro nailistang aksidente kada buean ko nagtaliwan nga dag-on ag 258 kara hay nagresulta sa pagkamatay.
Dugang pa ro report it World Health Organization (WHO) ko 2018 nga ro Pilipinas hay una sa ika-11 sa 175 nga nasyon sa may pinakamataas nga numero it pagkamatay sa trapiko sa karsada.
Ro Motorcycle Academy hay magasirbing refresher course para sa tanan nga motorcycle riders para sa basic riding skills, traffic rules and regulations, kaeowasan sa trapiko ag disiplina.
Kabay nga ro tanan hay mag enroll bangud nga raya hay libre.
Ro programa hay ginaeauman nga maumpisahan makaron nga unang quarter it dag-on 2023.
Engkasong dedmahon ag padayon nga magapangibabaw ro mga pasaway nga riders, basi nga obrahon eon raya nga mandatory.
Kon owa it training, indi taw-an it lisensya.
Kinahangean nga maging responsable ag disiplinado.
Kun magamotor, magpangamuyo ag isipon nga may pamilyang paga-ulian ag nagahueat.
Ride safe dapat pirme!
