Masobra sa 100 nga ahensya it gobyerno ro planong ibutang sa ayos.
Pagahinyuon sigon it Department of Budget and Management (DBM) sa Kongreso nga mataw-an it authority si Pangueong Ferdinand Marcos, Jr. para sa “rightsizing” agud nga makatipon it P14.8 bilyon pesos nga pondo kada dag-on.
Ro nasambit nga kantidad hay pwede sigon nga iga-allocate sa ibang priority projects kapareho it imprastruktura, social services, health ag agriculture.
Kapin sa 187 nga mga ahensya, departamento, opisina ag bureaus kaibahan ro government-owned and controlled corporations (GOCCs) nga bukon it sakop it GOCC Governance Act ro paga-usisaon nga may pareho eamang ukon overlapping nga mga obligasyon.
Angot kara, kapin sa daywang milyong empleyado it gobyerno ro maaapektuhan, apang bukon it kaibahan ro mga empleyado sa sektor it edukasyon, medical ag allied health services ag military ag uniformed personnel.
Ginpasiguro man nga ro mga maaapektuhan ukon maduea-an it trabaho hay pwedeng mag-apply sa bag-ong posisyon nga pagabuksan man it gobyerno sa idaeum it rightsizing program.
Indi gid man malikawan ro mga pagbag-o bangud nga kaparte raya it pag-umwad.
Nagaeaum kita nga ro mga mapahalin sa pwesto hay mataw-an sa gihapon it kahigayunan nga makapagtrabaho, eabi eon kon nagakabagay gihapon nga magapabilin sa gobyerno.
Samtang ro mga pasaway, eubusan eon kunta nga mapahalin ag mabayluhan it mga matuod nga public servant.
Ro pagtrabaho sa gobyerno hay kahigayunan bukon eamang para kumita it kwarta kundi eabaw sa tanan hay makaserbisyo sa atong mga kababayan .
