KALIBO, Aklan—Ginapadumdom it Civil Service Commission ro haeos 1.9 million government employees nga maging non-partisan ukon indi makipagbahin sa mga aktibidad nga nagapakita it suporta sa pulitiko.
Ginpaathag ni Leo Jamorin, director II it CSC Aklan ro pila ka mga sueondan ag basehan kon sa siin ginabawaean ro mga raya nga magkampanya sa sangka kandidato, pagbilog it grupo para mangayo it boto, mga meetings, rallies ukon parada para sa kandidato kamana man pagpanupod it mga literature, pagsuksok it gamit nga may pangaean it kandidato ukon political party pati man ro pagiging watcher.
Base sigon sa 1987 constitution nga indi pwede makipagbahin ro mga empleyado it gobyerno it direkta ukon indi direkta sa mga makarundayang klase it aktibidad nga kaparehas man sa nakabaehag sa CSC ag Comelec joint circular no. 1 series of 2016.
Paathag dugang ni Jamorin nga raya hay magasimbolo sa integridad it mga government employees sa nagkaeain-eain nga kontrata, regular, job order, contract of service ukon mga contractual sa idaeom it taeatapan it gobyerno pati man ro mga empleyado nga on leave of service.
Suno pa kana nga ro pwede eamang himuon it public servants hay ro pagboto, pagpahayag it andang opinyon ag baeatyagon sa political issues ukon mga diskusyon.
Kon madakpan ukon masayuran nga ro sangka public servant hay nag-eabag mahimo sigon nga suspendihon it sang buean hasta an-om nga buean sa first offense ag dismissal sa second offense.
Kon may masayuran nga nagahimo it makaraya nga aktibidad hay pwede nga ipaabot sa CSC pinaagi sa sueat.
Sa pihak nga parte, ginklaro ni Jamorin nga uwa pa it mga complains parte sa makaraya nga isyu iya sa probinsiya ag nagapati raya nga aware eun ro mga government employees sa makaraya nga sueondan.
Bukon man sigon it rason ro pagiging kapamilya it kandidato para nga maging exempted sa nasambit nga joint circular.
