Kalibo Aklan —— Uman nga nag-apela si Governor Florencio Miraflores sa mga pumueuyung Akeanon nga sundon regulasyon it anang ginpaguwa nga Executive Order no. 19 bangud nga raya hay para sa kamaeayran it tanan.
Suno sa gobernador nga umpisa lunes nga adlaw hay bawae eon nga makasueod sa Aklan ro sea and air travel .
Ginamandu man kara ro community quarantine ag social distancing agud nga masuk-ean ro coronavirus disease (COVID-19).
Magiging epektibo ro nasambit nga mga patakaran umpisa, Marso 16 nga magabuhay sa sueod it sang buean.
Hugut nga ginabantayan makaron it mga otoridad ro Kalibo ag Caticlan airports, kamana man ro mga pantalan sa banwa it New Washington, Batan, Caticlan ag Alegria sa banwa it Buruanga.
Gindugang pa it opisyal nga raya hay bukon it lockdown, ag hilway nga makahueag ro mga pumueuyu sa sueod it probinsiya .
Raya sigon hay community quarantine agud nga protektahan ro mga pumueuyu sa probinsiya eabi pa ag padayun ro pagtaas it kaso kara sa Metro Manila.
Gin-engganyo nana ro mga tawo nga kon owa man lang it importanteng lakad hay magpabilin eamang sa sueod it baeay agud nga malikawan ro local transmissions.
Ro tanan nga mga biyahero mapa-dumueuong man ukon residente it Aklan, nga nakabiyahe sa mga infected area ukon nakaangkon it contact sa may kumpirmadong kaso hay ginapa- home quarantine ukon magpabilin sa andang mga hotels sa sueod it 14-days.
Ginpahayag pa ni Miraflores nga nagahueag eon man makaron ro natungdan nga mga Barangay Health Response Emergency Team sa paghimo it mga preventine measures .
Samtang, gindugang pa it gobernador nga ginapatuman makaron ro 4-day-work-week sa Provincial Government nga gintunga kon sa siin may naga-duty lunes hasta huwebes ag martes hasta biyernes .
Sa makaron hay may daywang kaso it PUI sa probinsiya ag ginahueat eon lang ro andang confirmatory test halin sa Research Institute for Tropical Medicine ukon RITM .
Sa pihak kara, nagapabilin man nga COVID-19 free ro aklan.
