KALIBO, Aklan—Uman nga nagpagguwa it panibag-ong Executive Order si Governor Florencio Miraflores matapos nga ibalik sa Alert Level 2 ro probinsya it Aklan.
Nakabaehag kara ro pilang pagbag-o sa mga nauna eon nga ginpatuman nga sueondanan.
Suno kay Provincial Administrator Atty. Selwyn Ibarreta nga owa eon gina-require it lokal nga gobyerno it Aklan ro negatibong resulta it RT-PCR test sa mga biyahero partikular sa mga Returning Overseas Filipino ag dumueo-ong turista.
Kinahang-ean eamang suno kana nga fully vaccinated ag magpakita it vaccination card ukon certificate ro mga raya para makasueod sa probinsya it Aklan ag isla it Boracay.
Sa pihak nga parte, ginpasaka man sa 100 percent ro kapasidad para sa al fresco dining ag 70 percent sa indoor dining.
Ginapasugtan man ro 70 porsyento nga seating capacity sa mga pampubliko ag pribadong saeakyan.
Kung siin, ro operasyon it mga establisyemento ag pampublikong transportasyon hay nagapabilin umpisa alas-4:00 it aga-aga hasta alas-11:00 it gabi-i./
Samtang, ro curfew sa mainland Aklan hay naga-umpisa it alas-11:00 it gabi-i hasta alas-4:00 it aga-aga.
Kadungan it mga paghaeuga, padayun man ro pag-engganyo it gobyerno nga sundon gihapon ro health and safety protocols para masiguro nga eowas sa paeag it deady virus.
