KALIBO, Aklan—Eubus ro kasubo nga nabatyagan it pamilya it sangka 18 anyos nga binatilyo matapos raya nga magpakamatay sa payag it anang magueang sa Brgy. Muging, Banga.
Sa interview it Bombo Radyo, ginpahayag it ina it Grade 10 student nga biktima nga nagpabakae kana it cellphone ro anang unga nga nagabalor it masobra sa 6,900 pesos para sa anang online learning.
Ro biktima hay ikatlo sa limang magmaenghud.
Naghinyu sigon imaw sa anang unga nga maga-usoy it papaeayan agud nga makatipon it kwarta.
Suno sa ina nga masyadong pigado ro andang pagpangabuhi bangud nga imaw eamang ro nagatrabaho bilang labandera ag ro anang asawa hay indi eon masyadong maka-obra bangud sa kundisyon it anang ikamayad nga eawas.
Antes nga nagbigti hay nataeupangdan sigon nanda nga pirme raya nga tulala.
Nagapati ro ina nga eubus nga nadismaya ro anang unga matapos nga ginhana nanda nga magbo-oe it cellphone pinaagi sa home credit sa banwa it Kalibo , apang owa naaprubahan ro andang aplikasyon.
Samtang, nakadugang pa sa depresyon it anang unga ro pagpahalin kana sa pagbuyot it thresher.
Nagabulig suno kana ro anang unga sa pagtrabaho sa eanas para sa andang kinahangeanon.
Bandang alas-8:00 it gabie ko adlaw it dominggo natabo ro insidente.
Nasapwan eon lang sigon nana nga nakabitin ro biktima ag uwa eon it kabuhi.
Nagpakamatay ro biktima pinaagi sa paghigot it kaeat sa anang leog.
