Nagapabilin makaron sa intensive care unit it sangka pribadong ospital sa banwa it Kalibo ro sangka graduating student matapos nga gumiltak ro anang bungo kat tinamaan it bato ro anang dahi nga gin-eambaring it sangka eaeaki sa ginasakyan nana nga L300 van samtang ginabaybay nanda ro national highway nga sakop it banwa it Nabas pauli sa banwa it Malay.
Suno kay Ma. Christine Plaza, igmanghod it biktima nga si Mary Jane Plaza, 23-anyos it Sitio Lugutan, Brgy. Manocmanoc, Boracay hay nagakinahang-ean it insigidang medikasyon matapos nga naapektuhan ro anang utok kat gumiltak ro anang bungo.
Una kara, nag-atender it graduation si Mary Jane sa anang igmanghod man nga nagtapos sa sangka eskwelahan sa banwa it Ibajay ag samtang nagapauli eon hay gulpi eamang sigon nga may nag-eambaring sa andang ginasakyan nga behikulo ag kana tumama ro bato.
Bangud sa naangkon nga lastro hay ginsuhestyunan sanda nga ipaidaeom eagi imaw sa operasyon apang nagakinahang-ean it mabahoe nga kantidad.
Angot kara, nagapanawagan it bulig pinansyal ro pamilya Plaza para sa operasyon ni Mary Jane.Ro daeaga hay maga-graduate kunta sa July 11 sa Aklan State University Banga Campus bilang cum laude sa kursong BSED major in Mathematics.
Samtang, pinaagi sa Bombo Radyo Kalibo hay amat-amat eon nga nakalikom it pinansyal nga bulig ro pamilya Plaza.Nagta-o it paunang bulig si Mr. Adante Roldan Inamarga it kapin sa 20,000 pesos para sa operasyon it nasambit nga biktima.
