Una eon makaron sa maayos nga kondisyon ro graduating student nga si Mary Jane Plaza it Sitio Lugutan, Brgy. Manocmanoc, Boracay kasunod it madinaeag-on nga operasyon sa anang ueo sa Panay Health Care Hospital.
Suno kay Loren Joy Plaza, magueang it biktima nga nakakaon eon it lugaw ro anang manghod matapos nga pasugtan raya it doktor.
Samtang, pinaagi sa Bombo Radyo Kalibo, nagta-o it kapin sa P10,000 pesos si Mr. Denmark Suede it Sydney, Australia ag si Mrs. Aliandra Tambong it Poblacion, Banga para sa pinansyal nga kinahang-eanon it pamilya Plaza.
Mag-eowas kara, may mga naga adto sigon kanda sa hospital para personal nga ita-o ro andang bulig.
May kaangtanan, eubus ro pagpasaeamat it pamilya Plaza bangud nasugpunan ro kabuhi ni Mary Jane.
Madumduman nga ro cum laude student ro naapuruhan it bato nga gin-eambaring it suspek nga si Juluis Illiado sa ginasakyan nga L300 van it biktima samtang ginabaybay ro national highway nga sakop it banwa it Nabas.
