KALIBO, Aklan–Sangka granada ag sangka sachet it ginadudahan nga shabu ro narekober it mga otoridad sa sangka ginakabig nga high value individual sa ginpatigayon nga buy-bust operation kaina it agahon sa Sitio Bantayan, Barangay Calizo, Balete.
Naaresto sa nasambit nga operasyon si Arbie Ambrocio, 33-anyos, sangka chainsaw operator ag residente it nasambit nga lugar.
Ro operasyon hay ginpatigayon it Provinvial Drug Enforcement Unit (PDEU) ag Balete Municipal Police Station.
Nabo-oe sa anang posisyon ro sangka sachet it ginadudahan nga shabu ag kapin sa P21,000 nga buy-bust money.
Sa pag-usisa sa U-box it anang motorsiklo, narekober ro sangka Granada rason nga insigida nga gin-abisuhan ro mga tawo sa palibot kaibahan ro mga katapo it media nga magpaeayo.
Dugang pa nga nabo-oe kana sa pag-body search ro sangka kutsilyo nga may haba nga 5 inches.
Samtang, ginpahayag ni P/Major Bryan Alamo, hepe it Balete Municipal Police Station nga haeos daywang buean man nga ginpaidaeum sa surveillance ro suspek antes nga ginkasa ro operasyon.
Nakataeana eon kunta imaw nga magasueod sa anang trabaho kat arestuhon it mga otoridad.
Samtang, hugut nga ginpamalibaran it suspek nga imaw ro nagapanag-iya it mga narekober nga items.
Si Ambrocio hay nauna eon nga ginkanta it pilang mga drug suspects nga nauna eon nga nadakpan it mga kapulisan.
Apang makabig imaw nga newly identified nga personality sa pagduso it iligal nga droga kun sa siin sakop it anang operasyon ro ibang banwa.
Samtang, nagpatawag pa it mga tawuhan it Explosives Ordnance Division (EOD) para sa safekeeping ag nagakaigo nga disposal it granada.
Nag apela man sigon sa mga barangay council nga bantayan ro andang nasakupan bangud sa posibilidad sa pagbalik it illegal drugs kasunod it serye it mga buy-bust operations sa nagkaeain-eain nga mga banwa kun sa siin pila sa mga recoveries hay bulto-bulto.
