KALIBO, Aklan—Pormal eon nga nabaton makaron nga adlaw it Lunes, pinaagi sa sangka simpleng awarding ceremony it mga maswerteng nagdaog sa ginpatigayon nga grand draw it One..Two..Panalo Part 22 Promo it Bombo Radyo ag Star FM ro andang natungdan nga mga cash prize.
Sa Bombo Radyo Kalibo, ginbaton it first prize winner nga si Solly Baraca it Brgy. New Buswang, Kalibo ro anang P15,000 pesos nga cash prize.
Naggamit imaw it proof of purchase nga creamsilk.
2nd prize winner si Ternita de Pedro it Brgy. Talon, Altavas gamit ro proof of purchase nga creamsilk ag may premyo nga P10,000 pesos.
Samtang ro 3rd prize winner hay si Vilma Guarino it Brgy. Linabuan Sur, Banga nga naggamit it proof of purchase nga sunsilk ag magabaton it P5,000 pesos nga cash prize.
Sa pihak nga parte, ginbaton eon man it bag-ong milyonaryo ro anang nadag-an nga premyo nga si Evelyn Taguba it Malibay St. Tuguegarao City.
Kaibahan pa nga nagbaton it mabahoe nga cash prizes hay ro regional winner sa Visayas area nga si Jennifer Gacang it Pinamungahan, Cebu nga nagbaton it P50,000 pesos nga premyo.
Ro grand draw hay ginpatigayon ko Disyembre 23, 2023.
Kapin sa 6.5 million pesos nationwide ro gintaeana nga premyo para sa One..Two..Panalo Part 22 Promo.
Raya hay sangka pamaagi it Bombo Radyo Philippines agud nga ipaabot ro hantup sa tagipusuon nga pagpasaeamat sa mga suki nga tagpaeamati sa pag-obra kamon bilang numero unong estasyon it radyo sa bilog nga nasyon.
