KALIBO, Aklan—Nagpaguwa it executive order number 069 series of 2020 si Kalibo Mayor Emerson Lachica.
Sa nasambit nga EO, nakabaehag ro pag-lift ukon pagbueo sa ginpatuman nga granular enhanced community quarantine sa Purok 1 hasta it 5 C. Laserna St. ag surgical enhanced community quarantine sa porsyon it Mabini area ag Sto. Niño Village.
Raya hay matapos nga nag negatibo sa coronavirus disease ukon Covid-19 ro mga nakasalamuha it mga nauna eon nga covid-19 patient.
Ro nasambit nga desisyon ko alkalde it Kalibo hay epektibo alas-12:01 it tungang gabi-e Setyembre 28, 2020.
Samtang sa pihak nga parte, ginbutang sa surgical enhanced community quarantine ro Purok 6 C. Laserna St. umpisa it alas-12:01 it tungang gabi-e Setyembre 28 hasta it Oktobre 4,2020.
Raya hay matapos nga uwa pa nakaguwa ro resulta it swab test nga ginpatigayon sa mga nakasalamuha it natungdan nga covid-19 patient.
Sa makaron ro banwa it Kalibo hay may nabilin eon lang nga 24 nga mga active cases it Covid-19 matapos nga nakarecover eon ro 13 samtang an-om man ro namatay tuga it deadly virus.
