KALIBO, Aklan—Nagpaguwa it panibag-ong Executive Order si Mayor Rodel Ramos it banwang Batan agud paeawigon pa ro ginapatuman nga granular lockdown sa Sitio Centro, Brgy. Napti sa nasambitan nga banwa.
Raya hay antes nga maipaguwa ro resulta it real time reverse transcription polymerase chain reaction ukon RT-PCR test it mga ginboe-an it swab sample sa nasambitang lugar matapos ro pag-positibo sa coronavirus disease 2019 ukon COVID-19 it sangka 39-anyos nga eaeaki ag sangka Overseas Filipino Worker ukon OFW.
Sandig sa Executive Order No.2020-23 nga ginpagguwa ag ginpirmahan ni Mayor Ramos nga umpisa makarun nga adlaw, Setyembre 4 hay ginapaeawig pa ro lockdown sa lugar nga magatapos kunta kahapon Setyembre 3.
Suno kay P/Lt. Maricel Guevarra, hepe it Batan Police Station nga magapabilin ro andang gintaeana nga border checkpoint para bantayan ro hueag it mga pumueoyo sa lugar.
Sa makarun suno pa kana hay limitado ro oras it pagguwa it mga pomoeuyo kung sa siin ginataw-an eamang it masobra tatlong oras agud makapamakae.
Sambilog man sa sangka miyembro it pamilya ro pwedeng magguwa gamit ro quarantine pass ag sang beses sa sueod it sang adlaw eamang pwedeng gamiton.
Sa pihak kara, padayun ro andang panawagan sa publiko nga magsunod sa mga protocol agud makalikaw sa makamaeatay nga sakit.
Kaibahan eun kara ro mandatory nga pagsuksok it face mask ag face shield kung una sa pampublikong transportasyon.
