KALIBO, Aklan—Eubos ro pagpasaeamat it tanan nga pumueoyo it Sitio Libuton B it Barangay Bakhaw Norte, Kalibo matapos nga ginbuoe eon kahapon ro ginpatuman nga granular lockdown sa andang lugar.
Raya hay matapos nga nagpagguwa it Executive Order si Kalibo Mayor Emerson Lachica bangud sa pagnegatibo it resulta it RT-PCR test it tanan nga indibidwal nga nakasalamuha it sangka laboratory encoder it Molecular Laboratory nga nahamtang sa Aklan Provincial Hospital nga residente it nasambit nga barangay nga nagpositibo sa COVID-19.
Kung sa siin nagresulta sa pag-angkon it local transmission kat matapnan kara ro iba pa nana nga mga ka-trabaho.
Suno kay Punong Barangay Maribeth Cual, insigida nana nga gin-impormahan ro mga residente angot sa manami nga balita.
Raya sigon hay bunga it kooperasyon ag pagiging disiplinado it mga residente samtang may naga-iral nga lockdown.
Ginpabugae man kara nga hugut nga nagasunod ro anang mga kasimaryo sa minimum health protocols.
Kaangot kara, hilway eon nga makagguwa ag makapangita ro mga pumueoyo sa nasambit nga lugar.
Batyag man sigon it opisyal ro kasadya it mga tawo matapos kara nga ipaathag kanda ro impormasyon.
