KALIBO, Aklan—Ginpaathag ni Mr. Basil Tabernilla, Executive Assistant to the Mayor nga ro granular ag surgical lockdown kamana man ro contact tracing hay importante nga butang agud nga masuk-ean ro away kontra sa COVID-19.
Bangud kara, ginpahayag it opisyal nga kinahangean kara ro kooperasyon it tanan.
Ro apela sa publiko it LGU-kalibo hay kasunod it ginpatuman nga daywang domingo nga granular lockdown sa purok 1 hasta 6 sa C. Laserna St. Kalibo ag surgical lockdown sa pilang lugar sa Mabini Interior ag Sto. Nino Village Kalibo.
Gindugang pa ni Tabernilla nga ro lockdown nga ginpatuman sa mga apektadong lugar hay sangka pamaagi agud nga masiguro ro kaeowasan ag seguridad it mga indibidwal nga posibleng nakaangkon it contact sa mga confirmed COVID-19 patients.
Importante suno kana nga magpabilin sa andang mga baeay ro mga apektadong residente mag-eowas sa mga essential workers ag may emerhensiya agud nga malimitahan ro hueag it mga tawo kamana man nga maprotektahan ro andang propiyedad.
Dugang pa ni tabernilla nga samtang ginapatigayon ro lockdown, raya ro tiempo nga gina kompleto it contact tracers ro andang misyon nga mausoy ro mga nakasalamuha it pasyenteng may covid ag kon pasugtan ro mga tawo nga magbakwit sa ibang lugar hay magiging owa raya it pueos.
