KALIBO, Aklan–Nagbayanihan ro mga residente ag iba pang mga pumueuyu halin sa ibang lugar agud nga matapna ro mas pang pag-eapad it natabu nga grassfire pasado alas-6 kabi-e sa nabukid nga portion it Sitio Sa-id, Barangay Unidos, Nabas.
Suno kay George Estolloso, residente sa nasambit nga lugar nga gintinguhaan nanda nga indi maka-abot ro kaeayo sa naubos nga parte it bukid , kun sa siin , kapin sa 30 nga baeay ro nakatindog.
Ginhawanan sigon nanda ro lugar ag ginbasyahan it tubi ro mga uga nga tanum agud nga indi pagduktan it kaeayo.
Insigida man sigon nga nakaresponde ro mga tawuhan it Bureau of Fire Protection ukon BFP-Nabas, apang nabudlayan ro andang fire truck nga makasueod sa lugar bangud nga masyadong mapiot ag patakason rason nga ginsugpon-sugpon lang ro andang hose.
Sa mayad nga swerte ag owa man it nahalitan ukon nadaeahig nga kabaeayan.
Pasado alas-12 it aga-aga hay natapna ro nasambit nga grass fire kun sa siin haeos an-um nga oras ro pagtapna sa kaeayo.
Sambilog ro mainit nga temperatura ag mabaskog nga hangin ro ginatan-aw nga rason sa madasig nga pagkalhit it kaeayo kun sa siin padayun pa nga ginatukib ro ginhalinan kara.
Madumduman nga sangka grassfire man ro natabu sa nasambit nga lugar may tatlong dag-on eon ro nagtaliwan.
