KALIBO, Aklan — Ginamitan eon it Mines and Geosciences Bureau (MGB) it ground penetrating radar (GPR) sa pag-detect it mga iligal nga tubo nga naga release it maitom ag mabahong tubi sa front beach sa Station 1 sa isla it Boracay.
Raya matapos gin tugyan ni Atty. Richard Fabila it Community Environment and Natural Resources Office (CENRO-Boracay) ro trabaho sa MGB kasunod it gin himong pagkutkot kahapon kun siin natukiban ro limang mga pipelines sa Sitio Pinaungon, Brgy. Balabag.
Apang, owa sigon sa nasambitang mga tubo nagahalin ro mabahong tagas it tubi.
Nasayuran nga daywa sa mga raya hay gina panag iyahan it water utilities sa isla apang, owa pa masayuran kun sin-o ro naga panag iya it tatlong iba pa.
Nagapati si Atty. Fabila nga may naka-eubong pang tubo sa mas madaeom nga parte kara dahilan nga ginamitan it GPR.
Nagbo-oe man it water sample ro CENRO-Boracay sa lugar agud matumod ro lebel it fecal coliform sa nagatagas nga tubi.
Nagpamalibad man nga magtao it iba pang detalye ro MGB sa andang gina himong aktibidades.
Nasayuran nga ro GPR hay sangka modernong kagamitan it MGB kun siin pwedeng ma-x-ray ro sub-surface it eugta hasta it 80 meters ro kadaeom.
Ro GPR hay may tatlong component nga gina eakipan it antenna, monitor ag sensor.
