Nagpaandam ro grupo it mga mangunguma nga pagagamiton it rice traders ro mataas nga presyo it produktong langis agud nga baraton ro mga mangunguma sa manaba nga presyo it paeay makaron nga tyempo it anihan.
Suno kay Cathy Estavillo, tagapaghambae it grupong Bantay Bigas, maskin maeayo kita sa Middle East, nabatyagan naton ro impact it gyera pag-abot sa ekonomiya bangud nga ro Pilipinas hay number 1 importer it langis.
Bangud kara, nagatimbook ro presyo it produktong petrolyo kon sa siin nagadungan man kara ro mga nagapangunang baeak-eon nga kapin pang nagapabug-at sa paeas-anon it ordinaryong pumueoyo.
Uwa man suno kana nagataas ro sweldo it mga minimum wage earners kon sa siin ro andang kita hay kueang eon nga mayad sa andang pang-adlaw-adlaw nga gaeastuson kapin eon sa pagkaon.
Angot kara, nagpaandam si Estavillo nga base inde eon masarangan it publiko nga pakan-on it eksakto ag tatlong beses sa sueod it sang adlaw ro andang bilog nga pamilya bangud nga amat-amat eon nga nagataas ro presyo it bugas sa mga merkado.
Base sa andang ulihing monitoring halin kat nagtuhaw ro gyera daywang dominggo eon ro nakataliwan, kapin sa P44 hasta it P46 kada kilo ro presyo it regular milled rice; P47 hasta it P49 kada kilo mat-a ro well-milled rice ag P52 hasta it P55 kada kilo ro premium rice.
