KALIBO, Aklan—Uman nga nagpaabot it sentimiento ro grupo it mga negosyante sa tunga it mas hugut nga pagpatuman it COVID-19 restrictions sa probinsiya it Aklan.
Suno kay Mr. Jun Aguirre, Corporate Secretary it Philippine Chamber of Commerce and Industry ukon PCCI-Aklan nga ginareklamo nanda ro kawad-an it konsultasyon it Provincial Inter-Agency Task Force antes nga nagadesisyon sa pagpatuman it mga restrictions, kun sa siin, mayoriya sa mga negosyante ro apektado sa pagpasarado sa andang mga establismento komersiyal.
Bukon eamang sigon ro pamilya it mga negosyante kundi ro andang mga trabahador ro apektado.
Bangud kara, nagpadaea sanda it sueat sa taeatapan ni kalibo mayor emerson lachica ag provincial IATF angot sa andang mga rekomendasyon.
Tuyo sigon kara nga mabatian man ro andang parte agud nga mabalanse it gobyerno ro impact it pandemya sa negosyo ag sa ikamayad nga eawas.
Pila sa andang mga ginaduso hay buksan ro kalibo sa tanan nga mga pumueuyu ag indi paglimitahan, pagtau it ayuda sa mga apektado it surgical lockdown, pagdugang it numero it mga quarantine facilities sa kada barangay, pagbo-oe it dugang nga contact tracers, pagbakae it kapin sa 50,000 nga antigen testing kits ag dugang nga supply it bakuna.
Samtang, gin engganyo man nana ro mga maintok nga negosyante sa Aklan nga magpa-miyembro sa PCCI agud nga mas pang mapabaskog ro andang boses.
