KALIBO, Aklan—Sa pihak it ginapangatubang nga kalisod bangud sa krisis nga daea it covid-19 pandemic, owa nagduha-duha ro pilang ka mga grupo it pamatan-on nga maglunsar it nagkaeain eain nga programa ag adbokasiya nga makabulig sa mga pomoeuyong eubos nga naapektuhan it pandemya.
Kapareho eamang sa ginhimo it Youth Advocates for the Philippines- Western Visayas Region, sangka non-profit organization nga naglunsar it nagkaeain eain nga programa para sa komunidad bukon eamang it sa bilog nga western visayas kungdi maging sa iba pang mga lugar sa bilog nga nasyon.
Suno kay Mr. James Ryan Reposo, Regional Deputy Director it Youth Advocates for the philippines-western visayas region nga umpisang nag-eupok ro pandemya hay maabo eun sandang naipaabot nga bulig sa publiko.
Pila eamang sa mga raya hay ro programang “Tabang na karun aklan” nga nakatao it bulig sa 235 ka mga panimaeay maghalin nagkaeain eain nga kabanwahanan sa probinsiya.
Samtang, naabutan man it bulig sa nasambitan nga programa ro 150 ka mga frontliners.
Ro “Bayanihan para sa paaralan” nga nagtao man it bulig sa piling ka mga pampublikong eskwelahan para sa ginapatuman nga blended learning.
Dugang pa kara nga nagtao man sanda it bulig pinansiyal ag in kind donation sa mga naging biktima it bagyong ullysses ag bagyong rolly ko nagtaliwan nga dag-on sa may bahin it Luzon.
