Nagahinyu sa makaron ro Coordinating Council of Private Education Associations of the Philippines (COCOPEA) sa Department of Education (DepEd) nga pagabue-on eon ro pag-ban angot sa pagpatuman it blended ukon hybrid learning sa nagahilapit nga pagbukas uman it klase.
Raya hay matapos nga ginpahayag it DepEd nga maging mandatory eon ro pagpatuman it face-to-face classes sa tanan nga mga pribado ag pangpublikong skwelahan sa nasyon umpisa Nobyembere 2, 2022.
Kung siin kinahangean eon nga magpatigayon it in-person classes ro mga skwelahan limang adlaw kada sang dominggo.
Sa sangka pahayag ni Coordinating Council of Private Educational Associations of the Philippines (COCOPEA) managing director Atty. Joseph Noel Estrada nga nagapati sanda nga ro blended learning hay ro bwas-damlag it edukasyon rason nga ginahinyu nanda sa makaron nga pagasugtan sa gihapon ro pagpatigayon it blended learning sa masunod nga school year.
Dugang pa ni Estrada nga nagakabaeaka sanda sa posible nga maging epekto kara sa kalidad it edukasyon ag kaeuwasan it mga estudyante sa tyempo nga eubos eon nga igapatuman ro face to face classes sa mga skwelahan.
Sa oras sigon nga maga-umpisa eon raya hay posible nga indi eon ma-obserbahan ro hugot nga pagpatuman it social distancing sa sueod it mga kwarto, samtang ro mga estudyante man hay posibleng malisdan sa pagtutok sa klase bangud sa maabu nga numero it tawo.
Samtang, nauna eon man kara nga ginmanduan ni Education Undersecretary Epimaco Densing ro mga regional directors sa paghimu it desisyon para sa pagpabilin it mga health and safety protocols sa mga mga nasakupan nga skwelahan.
