Dismayado ag bukon it satisfied ro pilang grupo ag organisasyon sa tikang nga ginahimo makaron it gobyerno agud nga mabuhinan ro paeas-anon it publiko sa nagalala nga pagtaas it presyo it langis nga may domino effect sa nagapangunang baeak-eon.
Suno kay former kabataan partylist representative Rauol Manuel, may delaying tactics sa tikang it gobyerno nga kapin pang nagapakalisod makaron sa mga pumueoyo eabi eon sa sektor it transportasyon nga sanda ro unang tinamaan it sunod-sunod nga oil price hike.
Dugangan pa sigon sa komento ni Department of Energy ukon DOE secretary Sharon Garin nga uwa pa sanda it nakikita nga krisis sa supply it langis sa nasyon nga sa kamatuoran hay nagpabutyag eon ro sektor it transportasyon nga base sa pilang dominggo hay uwa eon it magabyahe nga public utility vehicle bangud sa inde eon nanda masarangan ro presyo it produktong petrolyo.
Suno pa kay Manuel, kinahang-ean it madalian ag madasig nga paghueag it gobyerno agud nga aksyunan ro presenteng sitwasyon it nasyon bangud nga kon magbuhay pa ro makaraya nga kahimtangan hay mas kapin pang maeomos sa kapigaduhon ro publiko.
