KALIBO, Aklan—Opisyal eun nga nagfile it andang certificate of candidacy ukon COC ro mga kandidato sa provincial level it partidong “Tibyog Akean”.
Dueo-eongan nga nagpadueong sa ACC covered court para sa filing it COC ro mga kandidato it partido sa una ag ikaywang distrito it probinsiya it Aklan.
Nasip-eatan man ro presensiya ni Aklan Governor Florencio Miraflores bilang pagpakita it anang pagsuporta sa partido sa pihak it anang pag-anunsiyo it pagretiro sa pulitika.
Nagpadueong man sa lugar si incumbent 2nd district congressman Teodorico “Nonong” Haresco apang nagpahayag raya nga hin-aga pa magafile it anang COC.
Ro nauna eun nga nagdihon it andang COC sa idaeum it partidong Tibyog hay sanday Ibajay Mayor Jo-en Miraflores nga magapailihir bilang gobernador it probinsiya ag si incumbent 1st district congressman Carlito Marquez.
Nagfile man bilang sangguniang panlalawigan it 1st district it probinsiya sanday Nemesio Neron, Mark ace bautista, Mark vega quimpo, Teddy tupas ag Apol Cleope.
Samtang sa second district man hay sanday Jay Tejada, Jojo Cordova, Larry Solidum, Jupiter Gallinero ag Lolong Dalisay.
Sa interbyu it bombo radyo, ginpahayag ni incumbent 1st district congressman Carlito Marquez nga bukas imaw sa posibilidad nga magiging engkwentro nana sanday Sangguniang Panlalawigan member Atty.Harry Sucgang ag Batan Mayor Rodel Ramos bilang kongresista it unang distrito.
Dugang pa kara nga kinahangean it publiko ro pagpanerbisyo rason nga anang gina-welcome ro sin-o man nga nagaka-interes nga magpailihir sa nagahieapit nga 2022 national and local elections.
Samtang sa pihak nga parte, ginkalipay man ni Ibajay Mayor ag governor aspirant Joen Miraflores nga naging maayos ro anang pagfile it COC.
Dugang pa kara nga gusto nana nga maipakita sa mga akeanon ro anang kapas sa pagpanerbisyo.
