KALIBO, Aklan – – – Gina hirit sa makaron it sangka grupo nga gina tawag nga “We are Boracay” sa gobyerno nga taw-an it haega ro negatibong impact sa temporaryong pagpasara sa isla it Boracay sa mga residente ag trabahador kamana man sa ekonomiya it nasyun.
Ro “We are Boracay” (WAB) hay sangka grupo it mga trabahador ag residente nga apektado it an-um nga bueang shutdown it Boracay matapos nga ipaidaeum ni Pangueong Rodrigo Duterte ro tatlong mga barangay it Yapak, Manocmanoc ag Balabag sa state of calamity.
Nasayuran nga nagpagowa it sentimiento ro grupo sa ginpatigayong pagpamati it House committee on natural resources ku Biyernes, Hunyo 1 sa Boracay.
Gusto it grupo nga buksan eon ro isla sa mga turista ag untatan eon ro demolisyon sa mga panimaeay ag magtaeana it onsite relocation agud malikawan ro pag abo it mga mawad-an it pangabuhian ag panimaeay.
I-tao eonman sigon ro madasig nga ayuda sa pagkaon, edukasyon ag trabaho.
Gin puna man it grupo ro padayun nga pag-deploy it security forces sa naga padayun nga paglimpiyo ag rehabilitasyon sa Boracay.
