Nagapanawagan ro Liquefied Petroleum Gas Marketers’ Association (LPGMA) sa mga nagabaligya it LPG nga itama ro andang presyo matapos suspendihon it gobyerno ro excise tax sa LPG ag kerosene sa tunga it mataas nga presyo it produktong petrolyo sa nasyon.
Suno sa grupo, may pila gihapon nga produkto nga ginabaligya it sobra kataas ro haega sa pihak it tax relief.
Ginpahayag ni LPGMA founder Arnel Ty nga dapat una sa P1,455 hasta P1,567 ro presenteng presyo it LPG.
Nagapanawagan man si Ty sa mga baealigyaan nga bag-uhon ro andang price board.
Suno kana nga nagpatuman eon it price adjustments ro mga miyembro it LPGMA matapos ipahayag ni Pangueong Ferdinand Marcos Jr. ro pagbo-oe it excise tax sa LPG ag kerosene.
Samtang, bukon man it pabor si Ty sa proposisyon ni Senator Sherwin Gatchalian nga magpatuman it price cap sa LPG, bangud nga posible sigon kara nga baeabagan ro mga importer nga mag-import it suplay. Suno kana nga kon maeayo sa presyo sa international market ro gintaeana nga cap, pwede raya nga magresulta sa kakueangan it produkto.
Dugang pa ni Ty, bastante ro suplay it LPG sa nasyon para sa kapin sa 50 diyas, eabi pa ag nagnaba it 30% ro demand makaron nga tag-init. Nauna eon nga ginpahayag it Department of Energy nga nag-order ro gobyerno pinaagi sa Philippine National Oil Company it 22,000 metric tons it LPG nga ginaeauman nga maga-abot sa ikaywa hasta ikatlong domingo it Mayo agud nga pabaskugon ro buffer stock it nasyon.
