KALIBO, Aklan—Igasapinal eon it grupo ni governatorial aspirant William Lachica ro andang linyada para sa eleksyon sa masunod nga dag-on.
Suno kana nga mag-eowas kara, paga-istoryahan man nanda ro petsa it andang pagdihon it certificate of candidacy ukon COC bangud nga gusto nanda nga dueueungan sanda nga maga-agto sa venue it Comelec-Aklan.
Mag-eowas kara, pagatalakayon man nanda ro partido nga pagasuportahan bangud nga maabu sigon ro nagapaeapit kanda kaibahan eon ro aksyon demokratiko ni Isko Moreno ag partido ni Manny Pacquiao.
Nasayuran nga ro kumpirmado pa eamang sa andang grupo hay ro pagpadaeagan nana bilang gobernador kaibahan ro anang running mate nga si board member atty Emmanuel nolly sodusta.
Ko nagtaliwan nga adlaw hay nagpahayag man it kasiguraduhan si board member atty harry sucgang nga magapadaeagan bilang kongresista sa ikaywang distrito apang matunog man makaron ro pangaean ni Batan mayor Rodel Ramos.
Sanday Sucgang ag Ramos hay parehong sa idaeum it grupo ni Lachica.
Engkaso nga matabu magiging 3-cornered fight ro congressional race sa eastern side it Aklan kaibahan si incumbent congressman Carlito Marquez.
Sa pihak nga parte, owa pa it may nagaguwa nga pangaean ro grupo nga magabangga kay incumbent 2st district congressman Ted Haresco ag retired army Lt. Matt Wacan nga nag-file eon it anang COC ko oktubre 1.
