Dismayado ro progresibong grupo nga Bagong Alyansang Makabayan ukon Bayan Aklan sa naging pahayag ni Pangueong Ferdinand Marcos Jr. nga uwa it maeauman nga kooperasyon maghalin kana ro International Criminal Court ukon ICC angot sa imbestigasyon kara sa anti-drug war campaign ni dating Pangueong Rodrigo Duterte.
Suno kay Mr. Kim Sin Tugna, provincial coordinator it Bayan Aklan nga tuyo kunta it ICC nga mataw-an it hustisya ro linibo nga mga namatay ag naging biktima it bukon it makatarungan nga anti-drug campaign it nagtaliwan nga administrasyon.
Nauna eon nga ginpahaathag ni Pangueong Bongbong nga maabu nga kuwestiyon sa hurisdiksyon it ICC sa Pilipinas nga puweding kabigon nga pagpakialam sa “internal matters” ag hangkat sa soberenya it nasyon.
Suno pa sa presidente, mag-eowas nga owa it jurisdiction ro ICC sa Pilipinas, may una nga kaugalingon nga kapulisan ro nasyon ag maayos ro hudikatura it Pilipinas.
Apang, suno kay Tugna, ro naga-iral nga justice system sa nasyon hay uwa gihapon nakata-o it hustisya sa mga nagapangayo kara nga biktima.
Madumduman nga gin-insister it presidente nga bukon it kinahang-ean it Pilipinas ro bulig maghalin sa ibang nasyon ag bukon sigon ro Pilipinas it kolonya nga gintawag nana nga “former imperialist.”
