Dismayado ro grupong Alliance of Concerned Teachers sa naging mga pahayag sa State of The Nation Address ni Pangueong Ferdinand Bongbong Marcos Jr.
Suno kay France Castro ro Representative it ACT Partylist nga owa it mga konkretong pahayag ro pangueo angot sa mga pagahiwaton nga tikang para sa eubusan nga pagresolba it mga isyu sa nasyon.
Masyadong naging ‘general’ sigon ro mga ginpahayag it pangueo nga mga programa nga igahathat kapareho it kung paano maaksyunan ro korupsyon sa gobyerno.
Owa man sigon hahathat ni Pangueong Marcos Jr. ro isyu it mga pageabag sa kinamatarong it sangka tawo nga sambilog sa mga nagapanguna nga problemang kinahangean taw-an it igtueupangod.
Sa anda man sigon sector hay owa man sigon ginhathat ro mabuhay eon nanda nga ginapanawagan nga dugang sweldo ukon salary upgrading.
Malabo man sigon ro naging pahayag kara sa pagsiguro nga maging maayos ag euwas ro tanan nga mga estudyante sa nagahilapit nga pagbukas it klase sa buean it Agosto.
Apisar nga may mga manami man nga proyekto nga naeakip ro pangueo kapareho it pagpatindog it mga specialty hospitals sa mga probinsya hay ro mabahoe nga hangkat kara hay kung siin magaboue it nagakaigo nga pondo para raya hay mapatigayon.
Kapin eon ag ro ginpahayag nga maging prayoridad kara hay ro infrastracture sector nga ga abot sa kapin sa sang trilyong piso nga pondo ro kinahangean.
Samtang, kulang man sigon ro mga ginhathat karang diskarte ukon pamaagi sa pagsabat sa pagpabaskog it produksyon it nasyon nga magasiguro it food security it nasyon.
