KALIBO, Aklan—Ginkakibot ag ginkadismaya it grupong Bayan National ro gin-akto ni Vice President Sara Duterte-Carpio sa pagpamati it House of Representatives partikular it Committee on Appropriations sa ginahinyo kara nga budget it Office of the Vice President.
Suno kay Raymond De Vera Palatino, secretary-general it nasambit nga grupo nga mabahoe ro responsibilidad it bise presidente sa pagsabat sa mga kutana bangud nga kwarta it pumueoyo ro anang pagagamiton.
Apang, masyadong mabahoe ro ginahinyo kara nga P2.037 bilyon pesos nga pondo it anang taeatapan para sa dag-on 2025.
Mag-eowas kara, uwa man it ginapresentar si Duterte nga makabaeaton nga programa ag proyekto nga pagagamitan sa anang ginapangayo nga pondo.
Ginpahayag dugang ni Palatino nga mas mayad ro ginhimo it mga kongresista nga ginbuhinan ro anang ginaduso nga pondo ag ginhimo eon lang raya nga P733 milyon pesos.
Ginpagbotohan raya it 139 members it Committee on Appropriations.
Apang, maisog gihapon ro sabat it bise presidente nga makatindog ro Office of the Vice President (OVP) maskin nga inde pagtaw-an it budget.
Madumduman nga daywang beses eon nga gin-isnab ni Sara ro hearing it House of Representatives angot sa ginahinyo nga budget it anang taeatapan para sa 2025.
Nasayuran nga ko nagtaliwan nga dominggo hay nagkainitan ro Vice President ag mga mamalidha nga miyembro it House appropriations committee kon sa siin nagapakita raya it kawad-an it respeto sa komitiba.
