KALIBO, Aklan—Ginkumpirma ni gubernatorial aspirant ag dating Kalibo Mayor William Lachica nga sarado eon ro andang grupo sa candidate substitution nga ro deadline hay sa maabot nga Nobyembre 15 eon.
Nagapati imaw nga owa eon it magabag-o it isip sa andang line-up bangud nga ro kada isaea sigon hay pormal man nga nagdihon it andang natungdan nga certificate of candidacy ukon COC ag owa it sin-o man nga nagpilit kanda.
Gindugang pa ni Lachica nga kompleto eon ro andang mga linyada sa unang distrito kun sa siin ro andang opisyal nga kandidato sa pagka-congressman hay si incumbent Batan mayor Rodell Ramos.
Samtang, owa pa sigon sanda it pormal nga pakikipag-istorya sa daywang kandidato nga nag-file it COC sa pagka-kongresista sa 2nd district rason nga owa pa it nabilog nga kasugtanan kon sin-o ro andang magiging manok.
Handum sigon it andang grupo nga makaangkon it pagbag-o sa probinsiya matapos ro pilang dag-on nga pag-gahum sa pwesto it sangka pamilya.
Madumduman nga ginapasugtan it Omnibus Election Code ro substitution it kandidato it sangka political party nga namatay, umatras ukon pinal nga na-disqualify kun sa siin dapat nga magahalin man sa partido ro igabaylo.
