Kalibo Aklan——–Nagpadumdom ro Bureau of Customs (BOC) sa publiko angot sa pagpadaea it mga balikbayan boxes sa nasyon kasunod eon man it nagahieapit nga kapaskwahan.
Suno sa ahensya, pwede raya nga ipadaea pinaagi sa mga corporations, partnerships ag sole proprietors apang mismong mga Qualified Filipinos While Abroad (QFWA) eamang ro pwedeng maka-avail it duty ag tax-free privilege sandig sa Section 800 it Republic Act No. 10863 ukon Customs Modernization and Tariff Act 2016 (CMTA).
Nakabaehag man sa nasambitang laye nga ro pagpadaea it balikbayan boxes it QFWA sa andang mga himata hay pwede man nga ma-exempt halin sa pagbayad it duties ag taxes it hasta sa tatlong beses.
Inde man dapat magsobra it P150,000 kada dag-on ro balor it total freight on board (FOB) ukon free carrier arrangement (FCA).
