KALIBO, Aklan—Nagapadayon ro imbestigasyon it pulisya angot sa natabo nga pagpang-eabo kon sa siin ro imbolbado hay magtiyo sa Brgy. Pampango, Libacao.
Ginkilaea ni PSSgt. Randy Zubiaga it Libacao PNP ro biktima nga si Jorie Gervacio, 24-anyos nga may igo it sanduko sa likod nga porsyon it anang eawas matapos nga gin-eabo it ginatumod nga suspek ag mismong tiyo kara nga si Edsel Natabio, 50-anyos ag parehong residente it nasambit nga lugar.
Base sa inisyal nga imbestigasyon it mga otoridad, nakaalitan it biktima si Saniel Natabio, onga it suspek bangud nga anang ginpabangdanan raya sa naduea nga susi.
Dikara eon sigon nagguwa ro anang tiyo ag gin-eabo imaw sa likod.
Bangud sa lastro nga naangkon hay insigida man nga gintabangan it anang pamilya ro biktima para madaea sa Aklan provincial hospital kon sa siin imaw sa makaron naka-confine para sa anang nagakaigong pagbueong.
Samtang, ro nasambit nga suspek hay boluntaryong nagsurender sa taeatapan it pulisya ag posibleng magapangatubang sa kasong frustrated homicide.
