KALIBO, Aklan —- Naga-abot eon sa 200 ro nailistang nag-eabag sa gun ban sa bilog nga Western Visayas suno sa report it Police Regional Office 6.
Raya hay umpisa Enero 9 hasta Mayo 7 suno kay regional police spokesman PLt. Col. Arnel Solis.
Kabilugan nga 113 nga nagkaeain-eain nga baril ag 100 nga bladed weapons ro natigayon nga makumpiska matapos nga maaresto ro mga violators.
Sa nasambit nga numero, 68 ro naaresto sa Negros Occidental, 32 sa probinsiya it Iloilo, 25 sa Aklan, 20 sa Iloilo City, 19 sa Bacolod City, 17 sa Antique, 11 sa Capiz, ag 8 sa Guimaras.
Gindayaw man ni PBrig.Gen. Flynn Dongbo, regional police director it Western Visayas ro tanan nga mga commanders sa bilog nga rehiyon sa hugut nga implementasyon it gun ban umpisa ko Enero 9 nga mabahoe nga bulig sa pagtapna sa pagtuhaw it krimen.