Sangka mabahoe nga wild nga elepante ro nagtuga it kinagamo sa sangka grocery store sa Thailand ko Lunes kat magsueod raya halin sa kaiping nga national park agud nga magkaon it mga pagkaon sa sueod it baealigyaan.
Sa sangka viral video, makita ro elepanteng eaeaki nga ginatawag nga ‘Plai Biang Lek’ nga nagpundo it makadali sa atubang it baraka maeapit sa Khao Yai National Park sa naaminhan-nasidlangan it Thailand antes eubusan nga nagsueod.
Dikara hay nagkaon imaw it kalmado it mga snacks halin sa counter maskin pa ginhana imaw nga pahalinon it mga tawuhan it parke.
Nagguwa ro elepante nga daea-daea pa ro sangka bag it pagkaon gamit ro anang mabahoe nga trunk.
Sangkiri eamang ro naging kahalitan sa pagsueod it higanteng elepante sa establisimento, kapareho it pagkalhit it eapok sa saeog ag sangkiri nga pagkasamad it kisame.
Suno sa tag-ana it grocery store nga si Kamploy Kakaew, nagkaon ro elepante it siyam nga pakete it sweet rice crackers, sangka sandwich, ag pilang ginpamaea nga saging.
Owa man it naninahan sa insidente.
Ginpahayag ni Danai Sookkanthachat, sangka volunteer sa parke, nga kilaea eon ro elepanteng si Plai Biang Lek sa lugar ag kaeabanan nga nagasueod raya sa mga baeay agud nga mag-usoy it pagkaon.
Raya eamang ro unang kahigayunan nga nakita nana raya nga nagsueod sa sangka grocery store.
Dugang pa nana nga amat-amat eon nga naga-inabu ro mga naga-warang nga elepante sa Khao Yai National Park nga nagaguwa halin sa kagueangan agud nga mag-usoy it pagkaon sa syudad, nga nagatuga it mas maabung kahigayunan it gulo.
Nasayuran nga ko 2024, ginaboeobanta nga may 4,000 nga nagtaeang nga elepante sa Thailand, apang bangud sa pagkasamad it andang ilistaran, napilitan ro mga elepante nga magguwa para mag-usoy it pagkaon nga kon amat hay nagatuga pa it peligro sa parehong tawo ag sapat.
