KALIBO, Aklan —- Nagpahayag it kahauman nga magasurender eon ro security guard nga nakapatay sa 23-anyos nga pawnshop manager-reliever nga si Bonna Hercia Ambay it Nauring, Pandan, Antique.
Nauna eon nga ginhambae ni Cristina Oraba, live-in partner it suspek nga si Mark Archie Torrefiel, 31, nga anumang oras hay magasurender eon raya agud nga atubangon ro anang kaso.
Sa pihak nga parte, aminado man ro suspek nga si Torrefiel nga problemado imaw sa kwarta rason nga napilitan nga magpanakaw sa pawnshop nga anang ginabantayan.
Nakaangkon sigon imaw it utang sa sugae sa namatay nga naga abiot sa kapin sa P8,000 ag ginapa-eukat man ro motorsiklo nga anang gin-prenda.
Gindugang pa kara nga owa man imaw it intensyon nga patyon si Ambay, apang nagpanic ag nagsukoe raya rason nga nabuno it makapilang beses sa nagkaeain-eain nga parte it anang eawas.
Naghinyu sigon imaw sa biktima nga itau ro kwarta nga anang kinahangean samtang nakatutok ro kutsilyo, apang nagpakamatig-a.
Plano kunta nana nga takpan ro anang baba ag iposas sa anang bangko ugaling hay nagsukoe ag nagsinggitan.
Nauna eon nga ginpahayag nga matapos nga mag-CR si Ambay hay naabutan nana nga ginabuksan eon ni Torrefiel ro vault.
Gin-aywan sigon nana nga nagapaligos sa kaugalingon nga dugo ro biktima ag ginsaraduhan ro pawnshop ag dali-dali nga nagsakay it tricycle pauli sa Cajilo, Makato ag ginsampit ro live-in partner nga magpanaw sa Metro Manila gamit ro alibi nga inatake sa tagipusuon ro anang ina.
Pagdungka sa Batangas port hay nagderetso sigon sanda sa Laguna sa pamilya it anang karelasyon.
Ro cellphone it biktima ag ro piggy bank eamang sigon ro anang natakaw sa pawnshop.
Naka-utang pa suno kana imaw it kwarta sa anang tiya nga P5,000 nga pamasahe nanda paagto it Manila.
Gindepensahan man nana ro anang live-in partner nga owa it kasayuran sa krimen nga anang nahimo.
Suno sa suspek nga maskin nga may mga kaso imaw it pagpanakaw, apang raya ro unang kahigayunan nga nakapatay imaw it tawo.
Eubus sigon ro anang konsensiya kadungan ro pagpangayo it kapatawaran sa pamilya Ambay sa anang nahimo nga krimen.
Ko 2016 hay sambilog man sigon imaw sa surrenderee it Oplan Tokhang sa Pasig City, kun sa siin natigayon nana nga natapos ro rehabilitasyon.
Sa resulta it post mortem examination, nagatuhaw nga ro biktima hay namatay bangud sa hypovolemic shock secondary to multiple stab wounds ukon tuga it blood loss.
