KALIBO, Aklan—Ginpasugtan eon makaron it gobyerno probinsyal ro 50 porsyento nga operasyon it fitness studios, gym ag swimming pool.
Raya hay kasunod sa abiso nga ginpaguwa ni Aklan Governor Florencio Miraflores.
Ro nasambit nga tikang hay bangud eon man sa nagapadayon nga pagnaba it kaso it covid-19 sa bilog nga probinsya kamana man sa paghaeoga it quarantine classification.
Mag-eowas kara, ro indoor dining hay pwede eon man sa 50% seating capacity samtang ro outdoor dining ukon Al fresco hay ginpasugtan eon sa 100% seating capacity.
Amat-amat eon man nga ginapasugtan ro pagpatigayon it mga meetings, conventions ag exhibitions apang kinahang-ean nga hasta eamang sa 30% seating capacity.
Samtang, ro social events sa eligible venue establishments kaparehas it kasae ag bunyag hay kinahang-ean nga magsunod ro mga raya sa 30% seating capacity.
