Kalibo Aklan —– Bangud eamang sa pagbuga it hangin maghalin sa tambutso it motorsiklo, sangka habal-habal driver ro ginbakoe it security guard sa sangka resort sa Brgy. Balabag sa Isla it Boracay.
Bale ro waea nga porsyon it siki it biktimang si Charlie Valentine, 24-anyos ag residente it nasambitang lugar matapos makipagdueomugan sa owa pa makilaeang gwardiya.
Base sa report, may dati eon nga alitan ro daywa kung sa siin kada magsakay sigon it pasahero ro biktima hay masami rayang ginabantayan it suspek hasta nga kabi-i samtang may sakay nga pasahero si Valentine hay naka-atubang ro tambutso it anang motorsiklo sa printi it resort.
Bangud kara, nagabot sa sekyu ro hangin nga nangin rason it pagkaakig.
Una eun sigon nga nagpangayo it pasensya ro biktima sa nasambitan nga gwardiya apang gulpi na eamang rayang ginbakeo.
Kat nabatyagan eon it suspek nga nabale ro siki it biktima hay kato na eamang raya ginbuhian.
Bangud sa insidente hay indi eun mahueag ni Valentine ro anang siki ag sa makarun hay padayun pang nakaconfined sa surgical ward it Aklan Provincial Hospital para sa nagakaigo nga medikasyon.
