Umabot eon sa masobra P1.6 billion ro haega it kahalitang tuga it mga serye it pagsabog it bulkang Kanlaon sa sektor it pagpanguma sa Canlaon City.
Suno kay Canlaon City Mayor Jose Chubasco Cardenas, mabahoe nga parte it mga sakahan sa nasambit nga syudad ro apektado sa mga serye it pagsabog, ag pagbagsak it abo ag iba pang volcanic materials.
Maabong industriya ro apektado kapareho it sugarcane industry, nga eubos nga nalistdan bangud sa sunod-sunod nga pagbuga it bulkan it mga bulto it asupre, antes pa man ro ulihing pagsabog kara ku Abril 8.
Mageuwas sa mga tubuhan, ro Canlaon City hay may maeawig man nga sakahan nga ginatamnan it paeay, mais, saging, ag mga highland vegetable.
Sa makaron, kapin 2,600 residente it Canlaon City ro temporaryong naka-istar sa waeong nakabukas nga evacuation camp sa nasambit nga syudad. Nagahinyo eon man ro city government it dugang nga bulig halin sa national government ag bag-ong sistema ukon istratehiya para mabuligan sanda sa andang sitwasyon kun siin masobra limang buean eon nga ginasuportahan ro mga gin-bakwit nga mga residente kasunod it December 2024 eruption it nasambi nga bulkan.
Ro bulkang Kanlaon hay una sa tunga it Canlaon City, La Castellana, La Carlota, ag Bago City.
