Kapin pang lumobo ro haega it gin-aywanan nga halit it bagyong Kristine sa sektor it agrikultura.
Base sa ginpaguwa nga report it Department of Agriculture – Disaster Risk Reduction and Management Operations Center, nagaabot eon sa P5.75 billion pesos ro haega it halit sa nagkaeain-eain nga industriya kaparehas it paeay, mais, high value crops, palaisdaan, poultry, makinarya, ag mga agricultural infrastracture.
Apektado kara ro 131,661 nga mangunguma ag mga mangingisda, samtang kabilugang 109,871 ektarya it mga taeamnan ag palaisdaan ro naapektuhan.
Humampak man sa 557,851 metriko tonelada it mga agri products ro natumod nga nasamad.
Halin sa masobra P5.7 billion nga haega it halit, ro paeay ro natumod nga may pinakamabahoe nga danyos nga humampak sa P4.25 billion pesos.
Ginsundan raya it mais nga may halit nga nagaabot sa P72.15 million pesos.
Ro nabilin nga kantidad hay nailista sa iba pang industriya.
Ginaeauman gihapon nga magabag-o ro datus bangud sa nagapadayon nga assessment ag validation sa mga lugar nga nahalitan sa pag-agi it bagyo.
