KALIBO, Aklan—Umabot it kapin sa P22.5 milyon pesos ro pondo sa naging renovation it Kalibo pastrana grand stand kaibahan ro children’s playground nga pormal nga ginbuksan ag ginbendisyunan sa ikaywang adlaw it Opening Salvo para sa Kalibo Ati-atihan Festival 2025.
Sa interview it Bombo Radyo, ginpahayag ni Kalibo mayor Juris Sucro nga ginkabuliganan nanda ni partylist representative Jojo Ang nga nakatipon it pondo para sa nasambit nga proyekto.
Nabuoe sigon it alkalde ro ideya sa ibang lugar nga bukon eamang it para sa mga inonga ro playground kundi may nakataeana man para sa mga may edad eon bangud nga ginbutangan it fitness area.
Ginpahayag dugang ni mayor Sucro nga kapin sa an-om nga buean ro pag-obra sa nasambit nga proyekto kon sa siin gindagsa eagi raya it mga inonga kaibahan ro andang mga ginikanan sa unang adlaw it opening.
Agud nga mapreserbe ro mga magpanami sa banwa it Kalibo, nagaapela ro alkalde sa publiko nga amligan ro mga ginbutang nga proyekto ag pairalon ro disiplina sa kaugalingon.
Magabutang man sigon ro lokal nga gobyerno it guidelines, bantay ag dugangan ro mga nakakabit nga cctv cameras sa bilog nga Kalibo Pastrana park.
