Humampak eun sa P4 bilyon ro gin-aywan nga haega it kasamaran it nagtaliwan nga 2 bagyo sa sektor it agrikultura sa nasyon.
Base sa datos halin sa National Disaster Risk Reduction and Management Council (NDRRMC) kahapon, bulto it nailistang kasamaran hay sa Bicol region nga sambilog sa eubos nga gindaeasa it bagyong Kristine nga humampak sa magsobra P2.831 million.
Samtang, mabahoe man ro kasamaran nga naagom it pagpanguma sa iba pang mga rehiyon kaibahan eun ro MIMAROPA, Central Luzon, Ilocos region, Eastern Visayas, CALABARZON, Western Visayas, Cordillera ag Soccsksargen.
Bangud kara, apektado makaron ro kabilugan nga 105,258 nga mangunguma ag mangingisda samtang sobra 90,000 ektarya it mga pananom ro hadaeasa it bagyong Kristine ag Leon.
Samtang, suno sa NDRRMC, nagapabilin gihapon nga ‘missing’ ro 30 indibidwal pati man ro numero it mga namatay sa kalamidad hay humampak eun sa 150 katawo.
Padayon gihapon nga nagarekober ro maabo sa atong mga kababayan nga gindaeasa it magkasunod nga bagyo, kun siin una sa P7.9 million indibdiwal o katumbas it sobra 2.028 pamilya sa 17 rehiyon ro apektado.
Una sa 311,980 indibdiwal o 81,716 pamilya ro nagapabilin gihapon sa evacuation center.
Pila sa mga raya hay nadueaan man it baeay nga una sa 155,121 kabaeayan bangud sa maeapnagon nga baha ag landslides daea it pagdaeasa it bagyong Kristine nga nagbuhos it uean nga katumbas it 2 buean nga pag-uean.
