KALIBO, Aklan—Haeos 126 nga mga sugaroe ro nadakpan it kapulisan sa ginpatigayon nga Anti-Illegal Gambling Operations sa bilog nga probinsiya it Aklan umpisa Enero hasta Nobyembre 9 it makaron nga dag-on.
Suno kay P/Maj. Mary Grace Borio, tagapaghambae it Police Regional Offfice ukon PRO-6 nga base sa datos nga gintau kana it Aklan Police Provincial Office ukon APPO nga sa kabilugan nga 45 nga ginpatigayon nga operasyon, 126 nga indibidwal ro naaresto samtang kapin sa 79,251 nga “taya” ukon bet money ro nakumpiska halin sa mga nagasugae.
Pila sa mga nadakpan hay naaktuhan nga nagahampang it tong-its, tupada, bingo ag iba pang klase it sugae.
Ro mga nadakpan nga suspek hay ginpasakaan eon it kasong kasong Presidential Decree ukon PD 1602 ukon Illegal Gambling Act, Republic Act 9287 ukon illegal number games ag PD 449 ukon mas kilaea sa Cockfighting Law of 1974.
Samtang, mag-eowas sa ginpabaskog nga kampanya kontra sa illegal gambling, hugut man nga ginatutukan makaron it PNP ro illegal drugs, loose firearms ag wanted persons.
