KALIBO, Aklan—Haeos 40 porsiyento ukon 15 milyon nga mga amerikano eon ro naka-boto haeos daywang domingo antes ro Nov. 3 nga eleksyon.
Suno kay Bombo International Correspondent Gabriel Ortigoza, registered nurse ag professor sa Sacramento, California nga mas maabu makaron nga estado sa US ro mas pabor nga magboto pinaagi sa mail kaysa sa magpila sa mga polling precincts nga kaeabanan nga nagabuhay it tatlo hasta pitong oras.
Mag-eowas kara, mas eowas sigon ro mail-in voting bangud sa paeag it coronavirus pandemic.
Ginaeauman suno kana nga sa mas temprano hay masayuran kon sin-o ro magadaog sa tunga ni President Donald Trump ag Democratic challenger Joe Biden.
Ginpahayag pa ni Ortigoza nga bangud nga ro California hay ginakabig nga blue state, kun sa siin sigurado eon ro pagdaog ni Biden sa nasambit nga lugar.
Nagpangibabaw sigon si Biden sa nasambit nga estado bangud nga nagapati raya sa science ag sa mga eksperto kaysa kay Trump.
Pumalpak sigon ro mga tikang ni Trump agud nga mapugngan ro pagpanaeasa it Covid-19 sa US nga nagpanguna sa may pinakamaabu nga kaso ag death toll bangud kara.
Abanse man raya sa foreign policy bangud sa mabuhay nga pagserbisyo sa mga amerikano , kun sa siin naging bise presidente ni dating US president Barrack Obama.
